Whistleblower Deklaratioun

D'Deklaratioun soll eng detailléiert Beschreiwung vun de Fakte liwweren, déi de Verdacht op de Bedruch oder d'Onreegelméissegkeet begrënnen. Se kann op lëtzebuergesch, däitsch, franséisch oder englesch agereecht ginn.

Mat der "Whistleblower"-Deklaratioun, gitt Dir der Autoritéit, déi d'Dossiere beaarbecht, d'Geneemegung fir Är Deklaratioun souwéi all weider Korrespondenz un déi zoustänneg national an international juristesch Autoritéiten, un d'Europäesch Kommissioun an un déi national an international Audit-Autoritéiten, déi fir den Opbau- a Resilienzplang kompetent sinn, weiderzereechen.

D'"Whistleblower"-Deklaratioun kann zu all Ament vum Whistleblower zeréckgezu ginn, virausgesat, dass déi Persoun, déi d'Deklaratioun zeréckzitt, Beweiser dofir virleeë kann, dass si den Auteur vun der ursprénglecher Deklaratioun ass.

Schutz vun de perséinlechen Donnéeën

D'Informatiounen, déi Iech betreffen, an déi iwwer de Kontaktformulaire vum Site gesammelt ginn, gi vum betreffenden Organ beaarbecht, fir Är Demande kënnen ofzewéckelen.

Andeems Dir de Formulaire ausfëllt, akzeptéiert Dir, datt Är perséinlech Donnéeën am Kader vun Ärer Demande verschafft ginn. Dës Informatioune ginn esoulaang vun der Administratioun gespäichert, bis d'Demarchë ronderëm Är Demande ofgeschloss sinn.

Well et vun der Demande ofhänkt, wéi laang déi matgedeelt Donnéeë versuergt ginn, deelt d'Organ op Ufro, Fall fir Fall, dës Dauer oder d'Kritären, fir d'Dauer festzeleeën, mat.

Zougrëff op Är Donnéeën huet d'Organ, dat fir Är Demande zoustänneg ass. Wann Dir wëllt wëssen, u wien d'Donnéeë vun dësem Formulaire weidergeleet ginn, da went Iech w.e.g. un d'Organ, dat sech mat Ärer Demande befaasst.

Esou wéi et am Reglement (EU) 2016/679 iwwer d'"protection des personnes physiques à l'égard du traitement des données à caractère personnel et à la libre circulation de ces données" steet, hutt Dir d'Recht, Är gespäichert Donnéeë kucken ze goen, se ze verbesseren oder a bestëmmte Fäll och läschen ze loossen. Ausserdeem hutt Dir d'Recht, Är Awëllegung zu all Moment ze widderruffen.

Mat engem begrënnte Motiv a virausgesat, datt d'Beaarbechte vun Ären Donnéeë keen obligatoresche Charakter huet, kënnt Dir donieft och Widdersproch aleeën.

Wann Dir vun dëse Rechter wëllt Gebrauch maachen an/oder méi wëllt iwwer d'Verschaffe vun Ären Donnéeë gewuer ginn, dann adresséiert Iech w.e.g. un dat betreffend Organ, deem seng Kontaktdaten Dir um Formulaire fannt. Doriwwer eraus kënnt Dir och eng Reklamatioun bei der nationaler Kommissioun fir den Dateschutz areechen (Commission nationale pour la protection des données, 1, Avenue du Rock'n'Roll, L-4361 Esch-sur-Alzette).