Steiertransparenz

Aleedung

© Thinkstock/Getty Images/iStockphoto, all Rechter virbehalen

 

Beim Europäesche Rot am Juni 2000 erreechen d'Memberstaaten de Konsens, dass den Austausch vun Informatiounen tëschent de Steierverwaltungen dat héchst Zil vun der Europäescher Unioun muss sinn. D'Finanzkris vun 2008 stäerkt d'Beweegung fir méi Steiertransparenz. Dësen Dossier stellt d'Efforte vir, déi Lëtzebuerg gemaach huet, fir säin Netz u Steierkonventiounen un den internationale Standard unzepassen.

2000-2010

Déi europäesch Fortschrëtt a punkto Steiertransparenz hunn hiren Ursprong beim Europäesche Rot zu Santa Maria da Feira (ënner portugisescher Presidentschaft), dee sech den 19. an 20. Juni 2000 getraff huet. Zum Schluss vun dëser Rotssëtzung hunn d'Memberstaaten de Konsens erreecht, dass den Austausch vun Informatiounen tëschent de Steierverwaltungen dat héchst Zil vun der Europäescher Unioun muss sinn, an dass dësen Austausch automatesch erfollege muss.

Op dësem Accord gestëtzt entsteet den 3. Juni 2003 d'Direktiv 2003/48/EG vum Rot, genannt "Spuerrichtlinn". Déi gesäit en automateschen Informatiounsaustausch iwwert Zënserträg vir. Zwielef vun den deemools fofzéng Memberstaate riichten en automateschen Austausch iwwert dës Revenuen an, während Lëtzebuerg, Éisträich an d'Belsch eng Iwwergangsregelung mat enger Quellesteier applizéieren.

D'Wirtschafts- a Finanzkris vun 2008 stäerkt a beschleunegt d'Beweegung fir méi Steiertransparenz an de Kampf géint d'Steiervermeidung, andeems se hir eng international Dimensioun gëtt. Am Mäerz 2009 kënnegt Lëtzebuerg seng Verflichtung un, sech dem Austausch vun Informatiounen op Demande no dem Modell vun der OCDE-Konventioun unzeschléissen. Ausserdeem hëlt d'Regierung Verhandlunge mat enger Dose Partner op, fir mat deenen Duebelbesteierungsofkommes ofzeschléissen an ze änneren, déi da vum Gesetz vum 31. Mäerz 2010 bestätegt ginn. Zanterhier huet Lëtzebuerg säi ganzt Netz u Steierkonventiounen un den internationale Standard ugepasst.

2011-2013

Op europäeschem Niveau gëtt déi administrativ Zesummenaarbecht am Steierberäich vun enger neier Richtlinn encadréiert, nämlech der Direktiv 2011/16/EU vum Rot vum 15. Februar 2011 iwwert d'Zesummenaarbecht vun de Verwaltungen am Steierberäich, déi en automateschen a spontanen Austausch vun Informatiounen op Demande tëschent de Steierautoritéite vun den EU-Memberstaaten ab dem 1.Januar 2013 virgesäit.

Ausserdeem huet Lëtzebuerg am Mee 2013 d'gemeinsam Konventioun vun der OCDE an dem Europäesche Rot vun 1988 iwwert déi géigesäiteg Amtshëllef am Steierberäich an hire Protokoll (ratifizéiert duerch d'Gesetz vum 26. Mee 2014) ënnerschriwwen, mam Zil, déi international Zesummenaarbecht vun de Verwaltungen am Steierberäich z'erliichteren.

Am selwechte Joer schléisst sech Lëtzebuerg der Aarbecht um Aktiounsplang vun der OCDE un, déi vum G20 an Optrag gi gouf, fir d'Entwécklung vu Moossnamen, déi Steierbasiskierzung a Beneficeverlagerung, genannt "BEPS" (Base Erosion and Profit Shifting), andämme sollen. Dëse Plang gëtt vun de féierende Politiker vum G20 am September vum selwechte Joer adoptéiert.

2014

Enn Mäerz 2014 ënnerschreiwe Lëtzebuerg an d'USA dat tëschestaatlecht Ofkommes "FATCA" (Foreign Account Tax Compliance Act), dat den automateschen Austausch vun Informatiounen tëschent der lëtzebuergescher an amerikanescher Steierverwaltung enthält. D'Ofkommes gouf mam Gesetz vum 24. Juli 2015 an nationaalt Recht ëmgesat. Dëse Passus op den automateschen Austausch vun Informatiounen tëschent Steierverwaltunge léist entscheedend Impulser op internationalem Niveau aus a mécht de Wee fir eng international Initiativ fräi.

Mat der Ënnerstëtzung vum G20 huet d'OCDE eng eenheetlech global Norm mam Numm "CRS" (Common Reporting Standard) entwéckelt, déi den automateschen Austausch vun Informatiounen iwwert Finanzkonte virgesäit a sech haaptsächlech vum amerikanesche Steiergesetz - FATCA - inspiréiert. De 15. Juli 2014 goufen d'Aarbechten ofgeschloss an den OCDE-Rot huet eng generell Norm geneemegt, déi dunn um G20-Sommet vum 20. an 21. September 2014 zu Cairns vun de Finanzministeren iwwerholl gouf.

Den 28. an 29. Oktober 2014 huet Lëtzebuerg zu Berlin e multilateraalt Ofkommes tëschent den zoustännegen Autoritéiten iwwert d'Ëmsetzung vun der neier globaler Norm ënnerschriwwen an huet sech engagéiert, den automateschen Austausch ab 2017 z'applizéieren.

Gläichzäiteg huet d'Europäesch Unioun d'Direktiv 2014/107/EU (Direktiv 2014/107/EU vum Rot vum 9. Dezember 2014 zur Ännerung vun der Direktiv 2011/16/EU a Bezuch op d'Verflichtung zum automateschen Austausch vun Informatiounen am Steierberäich) adoptéiert, déi den automateschen Austausch vu Renseignementer iwwert Finanzkonten tëschent de Memberstaaten aféiert.

Sou setzt sech d'Lëtzebuerger Regierung, zesumme mat anere Memberstaate, fir d'Adoptioun vun den OCDE-Regelen iwwert den automateschen Austausch vun Informatiounen als neie globale Standard an, andeems se d'Direktiv 2014/107/EU duerch d'Gesetz vum 18. Dezember 2015 an nationaalt Recht ëmsetzt. Duerch dës Initiativen, an zesumme mat ongeféier 50 aneren OCDE-Länner, déi den Austausch no dem CRS applizéieren, zielt Lëtzebuerg zu den "early adopters".

Am Kader vum Austausch vun Informatiounen op Demande hieft de Weltforum, an Unerkennung vun alle vun der Lëtzebuerger Regierung agefouert Moossnamen, besonneg d'Adoptioun am Juli 2014 vum Gesetz iwwert d'Immobiliséierung vun Inhaberaktien a -parten sou wéi vum Gesetz vum 25. November 2014 dat déi unzewendend Prozedur beim Austausch vun Informatiounen op Demande am Steierberäich virgesäit, d'Bewäertung vu Lëtzebuerg bei der Transparenz a beim Austausch vu Renseignementer fir Steierzwecker op de Niveau "wäitgoend konform" ("largely compliant").

2015

De Lëtzebuerger Virsëtz vum Rot vun der Europäescher Unioun vun 2015 mécht de Kampf géint Steierhannerzéiung a -vermeidung zu enger Prioritéit vu sengem Aarbechtsprogramm. Transparenz an Aféierung vu faire Spillregelen ("level playing field") weltwäit sinn noutwenneg Bedéngunge fir d'Wierksamkeet vun dësem Kampf.

Während dem Lëtzebuerger Virsëtz vum Rot vun der Europäescher Unioun gouf de 6. Oktober 2015 en unanimmen Accord tëscht de Memberstaate fonnt, fir d'Zesummenaarbecht tëschent de Memberstaaten am Steierberäich ze stäerken a vun der Benotzung vu virzäitege Steierentscheedungen, "rulings", fir mëssbräichlech Zwecker ofzeschrecken. Dëst gëtt an der Adoptioun vun der Direktiv 2015/2376 vum Rot vum 8. Dezember 2015 fir d'Ännerung vun der Direktiv 2011/16/EU a Bezuch op d'Verflichtung zum automateschen Austausch vun Informatiounen am Steierberäich ëmgesat an am Gesetz vum 23. Juli 2016 an nationaalt Recht iwwerdroen, wat en automateschen Austausch vu Rulings-Taxen a vun den Accorden iwwert Transfertspräisser ("advance pricing agreements") erméiglecht.

2016

De 27. Januar 2016 ënnerschreift de Finanzminister Pierre Gramegna de Multilateralen Accord tëschent kompetent Autoritéiten iwwert den Austausch vu Land-fir-Land-Deklaratiounen, eng wichteg zousätzlech Etapp zu Gonschte vun der Steiertransparenz op globalem Niveau. D'Land-fir-Land-Deklaratioun ass e weidere Fortschrëtt, deen d'Zesummenaarbecht an den Austausch vun Informatioune stäerkt, an dësem Fall am Beräich vun der Dokumentatioun iwwert d'Transfertspräisser vu multinationalen Entreprisen. Iwwert d'Aktioun 13 vum BEPS-Projet vun der OCDE gouf dës Deklaratioun duerch d'EU-Direktiv 2016/881 vum Rot vum 25. Mee 2016 zur Ännerung un der Richtlinn 2011/16/EU a Bezuch op d'Verflichtung zum automateschen Austausch vun Informatiounen am Steierberäich agefouert, an duerch d'Gesetz vum 23. Dezember 2016a nationaalt Recht ëmgesat.

2018

Wat d'Zesummenaarbecht vun den Administratiounen am Steierberäich ugeet, sinn déi néideg Upassungen fir d'Ëmsetzung vun der Direktiv (EU) 2016/2258, allgemeng "DAC5" genannt, déi de Steieradministratiounen den Zougang zu den Informatiounen am Zesummenhang mat der Bekämpfung vu Geldwäscherei garantéieren, duerch d'Gesetz vum 1. August 2018 ëmgesat ginn.

2019

2019 ass Lëtzebuerg vun der Peer Review Group vum Weltforum fir Transparenz an Informatiounsaustausch fir Steierzwecker (Forum mondial sur la transparence et l'échange de renseignements à des fins fiscales) vun der OECD bewäert ginn.
D'Beméiungen déi Lëtzebuerg säit der leschter Legislaturperiod am Beräich vun der steierlecher Transparenz ëmgesat huet, hunn hir Friichte gedroen. Lëtzebuerg huet als Gesamtnott "wäitgoend konform" (largely compliant) kritt wat déi international Norm vun Transparenz an Austausch vun Informatiounen op Ufro ugeet. De Rapport vum globale Weltforum, deen den 18. Mäerz 2019 publizéiert gouf, hieft ervir, dass Lëtzebuerg déi international Norm vum Informatiounsaustausch op Ufro wärend der Evaluationsperiod esou wuel legislativ ewéi och praktesch korrekt ugewannt huet.

2020

Am Februar hat Lëtzebuerg d'Geleeënheet, déi 34. Sëtzung vun der Peer Review Group vum Weltforum fir Transparenz an Informatiounsaustausch fir Steierzwecker vun der OECD z'organiséieren. Eng Ronn 100 Delegéierter hunn um Treffen Deel geholl. Eng Ronn honnert Delegéierter hunn um Treffen Deel geholl. Am Mäerz huet d'Chamber d'Gesetz ugeholl iwwer grenziwwerschreidend Dispositiffen, déi gemellt musse ginn, an domat d'Direktiv (EU) 2018/822, allgemeng "DAC6" genannt, ëmgesat. Si imposéiert eng Meldeflicht fir Vermëttler, déi fir hir Clientë grenziwwerschreidend Arrangementer mat enger potentieller, aggressiver Steierplanung entwerfen, vermaarten oder organiséieren. D'Gesetz trëtt den 1. Juli 2020 a Kraaft an déi éischt Gespréicher fannen nach an dësem Joer statt.

Aktualitéiten op gouvernement.lu (op Franséisch)

Richtlinnen (op Franséisch)

Legislatioun (op Franséisch)

Aktualiséiert